Valentine’s Day Thawn Pehpar In A Dik Lo Mi Khawruahnak Phun 4

Valentine’s Day Thawn Pehpar In A Dik Lo Mi Khawruahnak Phun 4

Ṭuan Thawm Thang

1. Ngaihzawng thuhlapawl thawn a pehpar-aw
Valentine’s Day hi ngaihzawng-awpawl ni tiah a sullam lehlin a si ruangah fala le tlangval si ih duhdawt-aw le ngaihzawng neitupawl lawngih hmang dingah ruah a si ṭheu. A taktak ahcun himi ni hi mai duhdawt mi, nel le ngainat mi zo pauhpauh hnen khalah duhdawtnak, nelnak le ngainatnak thuhla langter ding ni sawn a si.

Chocolate, pangpar lole thilri pakhat khat pek a si tlangpi ṭheu. Thungai takte ih sim ahcun dar pakhat khal hi tumtu nei lo ih a awn thei lo bangtukin mai lungthin sungah annihpawl hi ziangtitlukin ka duhdawt, ka nel ih ka ngaina a si ti mipawl khal hi hmuhsaknak tel lo cun awlsamte in theihsuah a theih lo. Curuangah tuini (Valentine’s Day) hi mai duhdawt mi, nel le ngainat mipawl hmuahhmuah hnenah duhdawtnak hi a tak ram rori ih phosuahnak ding ni sunglawi le hleice tak a si.

2. Duhdawtnak cu duhhiarnak hmangih langsuahter ding
Valentine’s Day hi kan minopawl hrangah cun pangpar cinnak bel a tlak-kuai ni tiah hminsinnak tuah vek tluk hi a si. Myanmar zuknung zoh ṭheutupawl cun kan theihfiang zet a zum um. Himi ni a ra thlen tikah mipapawl in an falapawl thawn umtlang dingah an sawm hai ṭheu, lailang takih sim ahcun hotel ih fehtlang dingah an dil ṭheu. I duhdawt ngaingai asile tuinite ah hin hminsintlak tak a si theinak ding hrangah ka thu hi i zawm hramhram-aw tiah an ngen. A sawm le dil menmen lawng si sehla; a zia-te a um deuh ding, hrekkhat cun a nawr zawngin an ti camcin. Himi men hman i thlun duh lo a si ahcun i duh taktak lo a si ko ding tiah sunsun, zanzan ṭawngkam hmangin buainak an hawl ciamco pan lo maw! Cumi tikah nunaupawl cun um thei loin an duh an rak zulh.

Sim theih duh mi tak cu duhdawtnak hi hmuhsaknak zawngih langsuahternak ding hrangah hin himi thuhla thawn zianghman pehzawmawknak a neih lo ruangah nunaupawl hrangah cun anmai thupi takih an ret mi vekin an um thei. Mai lungkimnak a um lo ahcun an el khal hi a thiang. A lehlam ah mipapawl khalin hitivekih an sawmnak hi a dik lo, tuah lo ding an si. Duhdawtnak hi a tak ram rori in i hmuh-aw tiah mai lam hrang lawngih cangai khawrh duhnak thinlung hi nunau pakhat na duhdawt taktak lonak na hmuhter bangtuk a si tiah a langfiang nasa.

Himi dinhmun ah hin thalaipawl hrangah lo theih lo ih ngaihtuah dingah cun virgin thuhla thawn pehpar in ruahdan le pawmdanpawl hi a bangaw hai lo. Mipapawl karlak khalah ṭhenkhat in himi hi zianghman ah an siar lo, anmah khal hi an virgin cuang lo, an fala khal hi a virgin le virgin lo thuhla thawn pehpar in buainak an tuah lo. Mipa hrekkhat cu anmah hi virgin lem lo khal sehla, an fala ding hrangah cun virgin a si lawnglawngah an duh, cule hitivek nunau lawng hi an ngai pawimawh. Ṭhenkhat mipa ve thung cu nupi an neih lai hlan lo hi an kilhim-aw ṭheu, an fala ding hrang khalah anmah vekih ser-aw thianghlim dingah an beisei in an phut ve.

Cutivek ṭhiamṭhiam-in nunaupawl lak khalah pakhat le pakhat an bangaw hai lo. Ṭhenkhat cun himi hi nunau pakhat ih manmual a si tiah an hmu, hrekkhat in virgin le virgin lonak hin nunau pakhat ih manmual ṭhensak a theih lo tiah an ti. Himi thuhla ah hin a dik le dik lo a ṭhendan thiam ding a har zet, asinan himi thupi ti mi khawruahdan phung a bangawk lo tikah buainak a suakter thei.

Tahṭhimnak ah virgin le virgin lo hi zianghman a thupi lo titu nunau pakhat in ngaihzawng a nei ih cumi a tlangvalpa thawn an rak cangsual pang, asinan pasal ding rori ih a duh taktak mipa dang pakhat thawn an tawnawk tikah a tlangvalpa cun virgin lawng ngai thupi mi a rak si ih an pahnih ah buainak a suak. Cutivek thotho-in mipa cun hitivek lam hi a ngai pawimawh lem lo tikah Valentine’s Day ah umtlang a duh, asinan a falanu cun virgin hi thupi zet ah a ret. A tlangvalpa cun a dil tam tukih tlunah hramhram ih a nawr camcin tikah thihnak lo cun in ṭhen hlah seh tiah kumkhua ih kutkai tlang ding mi hrangah a ti ih a duhdawt taktak ruangah a zawn lungin an umtlang.

Cumi thluh hnuah an thinlung a hmu-aw theisal nawn lo ih an ṭhenawksal tikah nunau lam cun nasa takin a tuar. Ziangruangahtile amah le amah hi manmual zianghman nei nawn lo mi nunau pakhat vekih a theihawk ruangah a si.

Curuangah hin nupi, pasal neihawk hlanih nupa sinak hman thuhla hi a dik le dik lo ti mi lam si sawn loin hitivekih buaibainakpawl um vivo thei mi a si ti hi minopawl theih cia ṭul mi a si.

3. Pawihruak thil thu ih hmang ṭheu mi naupai-khamnak sii hi umtlang ṭheh tinten ei ding

A tlun lamih sim zo bangin santiluan hi a thlengawk danglam vekin thalaipawl karlak khalah nupi, pasal ih neihawk hlan ihsin nupa bangih nupa sinak hmangtlang hi an pung sinsin. Himi hi a dik ih himi cu a dik lo ti mi rel duhnak lam a si lo, cumi lam cu ret lawk hril men sehla. Amahlawngte, minopawl karlakih a dikdawh deuh lo mi pakhat lawngte cu tarlang a ṭul zet in a lang.

Himi thuhlapawl hi an theih ṭheh a si ahcun thil hmuah an thiam thluh ding tiah kham an si ruangah thalaipawl hin theihfimnak lamah an tlaksam phah ṭheh. An theih mi hi a pawnlangte lawng hi a rak si. Ziang mi thil a si tiah cun nupa sinak hmangih umtlang ṭheh tinte in himi sii hi ei ding a si, cumi vialte hi a si. A dik takah cun himi sii hi amai hmin bangtuk hi a si, pawihruak thil thu (Emergency) dinhmun lawngih ei ding mi sii a si. Rin lo thil thu ih pangpar retnak bel a tlak-kuai lawngah ei ding, hitivekih hmuitin mi nei khawkhannak ah a kuai ringring ih ni 3 vei khat hrawngah himi pangpar retnak bel hi a tlak-kuai ahcun himi sii hi ei kirsal zawk rero a ngah nawn lo. (Himi hi rinloparal ih cangsual pang tikah nazi 72 sungih ei lawnglawngah sii in hna a ṭuan ding tiah sibawi cun an ti) Ziangruangahtile a ṭangkainak hi 87% lawng a si ruangah rinlopi in naupai sual pang a awlsam hrangah a si. Curuangah umtlang thluh tinte ih ei ding mi sii a si lo ruangah pawihruaknak thil thu lawngih hman ding sii a si. Nupi, pasal nei hrih lo, asinan hitivekih ni tin umtlang ṭheu na si ahcun condom lole ni tin ei ṭul mi siipawl hi rinsantlak mi naupai khamnak pakhat khat hi na hman lawlaw a ṭul ding a si.

4. Minopawl lamzin an fehsual lonak dingah hotel-pawl cek thluh ding

Himi Valentine’s Day vekah ṭuanvo neitupawl cun hotel-pawl hi an cek ṭheu, sii dawrpawl ah pawiruak thil thu ih hmang mi naupai khamnak siipawl an cek hai fawn ṭheu. Thungaithlak takin hun ngaihtuah hnik sin awla, hitivek thuhlapawl hi tuini ni khat lawngih thil cang mi a si lo. A hung thlengaw danglam mi nuntukhawsatdan cun thil fehdan phungthluk pakhat vekah thalai ṭhenkhat cun an hmu ve men. Himi hi minung pakhat ih thutluknak a si, va khamsak ciamco khal a theih lo. Cuih tlunah va khamsak camcin khalah zianghman danglamnak a um cuang fawn lo. Minopawl karlakih an beisei lo mi nau an pai pangsualnak dik tak hi theihfimnak lamih an tlaksam ruangah a si. Himi hi theihfiang a ṭul in a-cu zet mi khal a si fawn. Himi thilpawl hi an theih thluh tikah thil si lolo an thiam ṭheh ding tiah zianghman theihter lo le simfiang lonak hi remṭhat a ṭul rori a si. Thalaipawl lawng si loin Nauhak Sunday School Department ihsin nunau-mipatnak lam zirthiamnak (Sex Education) thuhla thawn pehpar in zirh tam sinsin a-cu ih hleiah a ṭulsam tuk lawmam! Himi thuhla tak hi tuini kan tawn rero mi buainakpawl ih a rahsuah (Result) mi a si ti khal hi ṭuanvo neitupawl zate hnenah theihter ka duh mi a si.

Source: Good Health Journal, 12 February 2018.