Bel Sungih Tidai Le Tiva Sungih Tidai

Bel Sungih Tidai Le Tiva Sungih Tidai

Lairawn Meifar

Veikhat lai ah tiva kap innte ih um putar pakhat hnenah tlangval pakhat a ra thleng. Cuih tlangval pa in putar pa hnenah, “Ka pu, thu pakhat ka lo sut duh,” a ti ih putar pa in, “Na theih duhmi in sut thei ko,” tin a let.

Cutikah tlangval pa in, “Kei cu tivaral khatlam khua ih ummi ka si. Khawsung mi zozo khalin in hmuhsuam. Ka rethei ruangah in nautat. Ka hmelsiat ruangah in hmuhsuam. Ka niam tuk ruangah in zawnsak. Thinlung sia ka si fawn lo, zawnruahnak ka nei zet ko. In hmuhsuam dan hi ka ruah tikah tuar a har pam. Ka thinheng ngaingai. Hiti ih in hmuhsuam hi ziangtin ka lehrul ding,” tin a sut.

Putar pa in, “Na thinlung a ṭha ngaingai maw? Cun zawnruahnak teh na nei ngaingai maw?” tin sut phah in a kiangih tidai retnak bel a lak ih tlangval pa cu tiva lamah a fehpi. Tiva an thlen tikah putar in bel sungah tidai khat ko in a thun ṭheh hnuah lungto pakhat a ret. Cutikah tidai cu bel sung ihsin a lenglam ah an liam thluahthlo.

Tawkfang in putar pa in lungto tum deuh a lakih tiva sungah cun a vun deng. Cutikah cuih lungto ruangah tiva ih tidai cu ticawk malte a um. Asinan rei lo te ah a rehsal.

Cuihsin putar pa in tlangval pa hnenah, “Tlangval pa, tiva sungih tidai maw, asilole bel sungih tidai ha na si?” tin a sut ih tlangval pa in, “Tiva sungih tidai ka si,” tin a let. Cutikah putar pa in, “Nangmah le nangmah tiva sungih tidai ka si tiih na ruahawk a si ahcun midang in lungto ih den ruangah ziangah bel sungih tidai vekin lenglam ah liam na tum duh rero,” tin a ti.

ZIRH DUHMI

(1) Na lungput le na mizia hi tiva sungih tidai vek a si ahcun midang in hmuhsuamnak le relsiatnak timi lungto thawn an lo den ruangah thinhar in um hlah.

(2) Tiva sungih tidai ah lungto den ruangih a thomi ticawk hi can rei lote sung a si; cuvekin kan lungput a ṭhat taktak a si ahcun midang ih donak ruangah kan tonmi pawl cu can rei lo sungte lawng a si.

(3) Lungput a ṭhami cun mi in ziangvekin hmuhsuam in dodal hmansehla a hmuhsuamtu le dodaltu pawl parah nehtu a si ringring.

Hram: Thinking Concept/Thetthancho