Ralkap In Danhrampi Ṭhiatbal In Inn Hngak Acozah Thar An Din Maw Si?

Ralkap In Danhrampi Ṭhiatbal In Inn Hngak Acozah Thar An Din Maw Si?

(Cahram-Mizzima)

Rampi thuneihnak laksaktu SAC ralkap in anmai thuneihnak sung ihsin Inn Hngak Acozah thar an din ruangah 2008 danhrampi (Cabu Hring) hi an ṭhiatbal maw si? Timi hi thusuhnak tuah a cu zo tiah danthiam pawl cun khaikhinnak an sim.

August 1, 2021 ah State Administration Council (SAC-ralkap) in Administration Council Committee ai ah Inn Hngak Acozah (‎Caretaker government- အိမ်စောင့် အစိုးရ‎) din a si thu ralkap council ih sungṭuan Lieutenant General Aung Lin Dwe in thu a suah.

A thok ihsin ralkap (State Administration Council-SAC) hi 2008 danhrampi vekin mipi in an cohlan le cohlan lo cu thuhran, 2008 danhrampi thawn a remaw deuh ti ih rel theih fangfang a si lai ah Inn Hngak Acozah a dangten a thar an din sal timi cu 2008 danhrampi hi an hlon felfel zo tinak maw si? Danhrampi kalh in an feh timi kan ruah a ṭul thlang. A minung thlengawknak a um lo, a hmin lawng thleng a si khalah danthiam thlirnak ahcun 2008 danhrampi thawn a kalh aw maw? Cu lo asile danhrampi an ṭhiatbal ti ih thusuhnak pakhat um thei mi a si”

Tuih a din mi ah rampi Prime Minister ah ralkap State Administration Council Chairman, Vice Prime Minister ah State Administration Council Vice Chairman, Union Ministers le a dang pawl an si. A thok ih an hmin State Administration Council ai ah Inn Hngak Acozah tin an thleng mi a si.

2008 danhrampi an ṭhiatbal lo, thuneihnak an lak pekte ah ram danhrampi vekin kan feh ding tiah dan vekin thusuah an tuah. Tu ahcun 2008 danhrampi thlun lo in Inn Hngak Acozah an din thu an sim lala.

1958 ih U Ne Win inn hngak acozah a din dan le Min Aung Hlaing ih inn hngak acozah a bangaw lo. U Ne Win san ih inn hngak acozah an din ṭum ah danhrampi thawn a kalhawk ruangah thuneihnak an pumbilh ih rorelnak parliament acozah an ṭhiatbal thluh. Thuneihnak an laksak thu tlang zetin an phuang, 1947 danhrampi khal an ṭhiat thluh hnuah inn hngak acozah a din.

Danthiam thlirnak in kan sim asile 2008 danhrampi sungah Inn Hngak Acozah a din theih timi a um lo. A thok ih an feh dan ahcun U Myint Swe in a langten President ṭuanvo a la. A langten President ṭuanvo latu in thuneihnak a pe tivek in an feh. A thok ih State Administration Council (SAC-ralkap) kha cu 2008 danhrampi section 417nk vek deuh in an din mi a si. Hi mi tiangah cun buainak a um hrih lo. Asinan tui ih inn hngak acozah a dang ten an din mi hi cu 2008 danhrampi sungah a um lo. Danhrampi thawn a kalhaw maw timi cu danhrampi ṭhuthennak zung ih thuṭhen sak ṭul dinhmunah kan thleng tinak a si.